Сите мерки, активности и заклучоци, во функција на превенција за ширење на болеста Ковид-19, ќе важат до завршување на периодот на вонредна состојба, информираат денеска од Владата.
„На 25. седница од 21 март 2020, покрај усвоените заклучоци, во функција на преземање дополнителни мерки и активности за превенција од ширење на болеста Ковид-19, се донесе и заклучок со кој се утврдува дека сите донесени заклучоци, мерки, препораки и насоки за сите органи на државната управа, јавните претпријатија основани од државата, акционерските друштва во државна сопственост, агенции, фондови, бироа, заводи, управи и сите останати државни институции, ќе важат до завршување на периодот на вонредна состојба на територијата на Република Северна Македонија“, се вели во соопштението од владината прес-служба.
Од Владата им укажуваат и на единиците на локалната самоуправа, на јавните претпријатија и другите правни лица основани од единиците на локалната самоуправа, како и на приватниот сектор, дека сите заклучоци, мерки, насоки и препораки во функција на преземање дополнителни мерки и активности за превенција од ширење на болеста Ковид-19 важат до завршување на периодот на постоење на вонредна состојба.
На синоќешната владина седница беше донесена одлука за забрана на движењето на младите до 18 години од 21 часот до 12 часот, а на постарите од 67 години од 11 до 05 часот наредниот ден. Премиерот Оливер Спасовски во гостување на ТВ 24, појасни дека тоа значи дека младите до 18 години ќе можат да се движат од 12 часот напладне до 21 часот, а возрасните над 67 години од 05 часот до 11 часот претпладне.
„Тоа е направено за да не се поклопуваат овие две возрасни групи, младите како преносители на коронавирусот, а повозрасните како најризична категорија граѓани“, истакна премиерот Спасовски.
Спасовски информира и дека полицискиот час за сите се поместува од 21 часот до 05 часот наместо до 06 часот, поради гужвите што се создадоа во јавниот превоз и поради потребата на граѓаните да стигнат на работните места во утринските часови.
Спасовски не исклучува и дополнителни рестриктивни мерки зависно од тоа какви ќе бидат проценките за развојот на настаните и колку граѓаните ќе бидат дисциплинирани во применувањето на досега донесените. Апелира до сите да ги почитуваат воведените мерки и да останат дома, со цел да се запре ширењето на коронавирусот.
За денеска на седница на Кризниот штаб најави дека ќе биде разгледана и можноста за целосно укинување на јавниот превоз.