Приватна фирма која била ангажирана за прославата „Одиме напред – Македонија во НАТО и ЕУ”, за обезбедување на сценска опрема, бини, системи за озвучување и осветлување, ќе треба да врати околу 30 000 евра во државниот буџет. Од Владата објаснуваат дека „биле потрошени помалку пари од предвидените“ и постапката за враќање на парите е веќе започната. Договорот со фирмата која била ангажирана за бините и озвучувањето бил во во висина од околу 80 000 евра, а се потрошиле 49 000 евра односно по 3200 евра по град.
„Договорот за обезбедување на сценска опрема, бини, системи за озвучување и осветлување е склучен пред одржувањето на настаните, а во текот на реализацијата и состојбите на терен е констатирано дека се потребни помалку пари и оттука потрошени се помалку средства. Постапката за враќање на парите коишто не биле потрошени е веќе започната и Владата на Република Македонија очекува во буџетот на Република Македонија, од страна на приватна компанија, да се вратат околу 30.000 евра“ велат од Владата.
Одговорот од Владата стигна по обвинувањата од опозициската ВМРО ДПМНЕ дека за прославата за НАТО се потрошени повеќе од 180 000 евра, како што првично соопшти Владата.
Од ВМРО ДПМНЕ рекоа и дека тендерските постапки околу организацијата на прославата за поканата за влез во НАТО се „симптоматични, упатуваат на монополизација на тендерските постапки и дека однапред било договорено кои блиски фирми на СДСМ ќе профитираат“. Огласите за двете набавки воопшто не биле објавени на сајтот за јавни набавки во делот „други огласи“ и не била обезбедена конкуренција што е законска обврска согласно Законот за јавни набавки.
Од увидот во договорите што биле потпишани, велат од ВМРО-ДПМНЕ, се утврдува дека тендерските документации биле изработени на 10 јули понудите биле доставени наредниот ден на 11 јули, а веќе на 13 јули договорите биле склучени. Ако се работела за итна постапка Владата требала постапката да ја спроведе согласно член 99 од Законот за јавни набавки која повикува на итни постапки за тендери велат од опозициската партија.
Од Владата одговораат дека постапката за избор на фирми за прославата „Одиме напред – Македонија во НАТО и ЕУ”, е спроведена законски, со запазување на принципот на конкуренција и во транспарентна постапка.
„Постапката е реализирана согласно член 17 став 1 алинеја 2 од Законот за јавни набавки, за услуги за коишто законот дозволува, поради краткиот временски период да се испратат покани до неколку економски оператори. За двете спроведени постапки се испратени покани до 3 економски оператори и операторите доставиле понуди. На тој начин принципот на конкуренција е целосно запазен“ пишува во одговорот од Владата. Изборот на најповолен понудувач бил направен според понудената најниска цена.
По Самитот на НАТО во Брисел, на кој Македонија доби покана за членство во Алијансата, Владата на 14 јули, организираше прослава насловена „Одиме напред – Македонија во НАТО и ЕУ“. На овие прослави настапија околу 40 артисти низ 15 градови во државата.