Полициски час од 22 часот навечер до 5 часот наутро за Скопје, Куманово, Тетово и Штип со дел од околните општини ќе нема. Предлог на Комисијата за заразни болести не мина на денешната 63. валдина седница на која министрите имаа спротивно мислење од она на стручно советодавното тело при Министерството за здравство, па забраната за движење засеге не е опција.
Но, во врска со спречување на внесување и ширење на коронавирус Ковид-19, Владата заклучи да се воведат засилени контроли и мониторинг во таргетирани подрачја на градот Скопје и општините во градот Скопје, потоа во околните скопски општини Арачиново, Студеничани, Илинден, Петровец и Зелениково, како и во општините Куманово, Липково, Штип и Карбинци, Тетово и тетовски општини Боговиње, Брвеница, Теарце, Желино и Јегуновце во кои е регистриран поголем број на новозаразени граѓани.
Во таа насока, Владата ги задолжи Министерството за внатрешни работи, Инспекцискиот совет и Финансиската полиција да изготват посебни акциски планови за контрола и за спречување на отстапување од мерките за заштита, како и санкционирање на секое непридржување до донесените мерки.
Владата донесе заклучок дека инсталирање на апликацијата „СтопКорона“ да се наведе како задолжителна во секое решение за изолација што ќе го донесе Државниот здравствен и санитарен инспекторат. Секое прекршување на одредбите од решението за изолација ќе биде санкционирано со државен карантин.