Управувачкиот комитет побара воведување на кризна состојба во траење од 30 дена поради пожарите што неколку дена беснеат на територијата на Македонија за што ќе расправа Владата на седницата што е закажана за претпладнево во 08:30 часот.
– Управувачкиот комитет се обрати со барање за воведување на кризна состојба во траење од 30 дена за што ќе расправаме на Влада утре сабајле во 08:30 часот и ќе донесеме одлука, изјави Заев за ТВ 21.
Центарот за управување со кризи (ЦУК) претходно соопшти дека Управувачкиот комитет на седница го прифатил предлогот на Групата за процена и предлага на Владата да донесе одлука за постоење на кризна состојба на целата територија на државата во траење од 30 дена.
– Групата за процена, составена од директорите на ЦУК, ДЗС, АНБ, БЈБ, Агенција за разузнавање, заменикот на началникот на Генералштабот на Армијата, раководителот на службата за воена безбедност и разузнавање, замениците директори на ЦУК и ДЗС, и советникот за национална безбедност од кабинетот на Претседателот, попладнево одржа седница на која поради зголемениот обем на пожарите, зголемениот ризик за граѓаните и неколку други причини донесе едногласна одлука да му предложи на Управувачкиот комитет (министрите за внатрешни и надворешни работи, одбрана, здравство, транспорт и врски, како и раководителот на групата за процена) да предложи на Владата да донесе Одлука за постоење на кризна состојба на територијата на РС Македонија заради зголемена појава на пожари и спречување од нивно ширење во траење од 30 дена, информираше ЦУК.