Економско – социјалниот совет кој ќе се одржи вечерва во Владата е нов обид да се постигне договор за покачување на минималната плата помеѓу социјалните партнери – Владата, синдикатите и работодавачите.

Министерката за труд и социјална политика, Јованка Тренчевска, во гостување на ТВ24, рече дека власта разгледува неколку алтернативни решенија за кои ќе се разговара на вечерашниот состанок.

Имаме неколку предлози од социјалните партнери од ССМ, Организацијата на работодавачите и Бизнис конфедерацијата на Македонија ги разгледуваме предлозите се прават проекции на истите. Верувам дека денес, со продолжението на социјалниот дијалог ќе го донесеме најсоодветното решение кое ќе биде прифатено од сите социјални партнери“, рече Тренчевска.

Според неа, подобрувањето на економскиот статус на работниците е врвен приоритет на Владата, па оттука и заложбата за зголемување на минималната плата.

„Меѓутоа секоја политика која што се носи, а е во интерес на подобрувањето на политичките права и е поврзана со трудот мора да минува низ економскиот совет“, вели Тренчевска додавајќи дека верува дека денеска во 19 часот со образложение, предлогот за минимална плата ќе биде прифатен од сите страни.

Вчера и премиерот Димитар Ковачевски преку објава на Фејсбук порача дека покачувањето на минималната плата ќе биде исполнето.

Владата е на страната на работниците – покачувањето на минималната плата ќе биде исполнето.Отворениот социјален дијалог со сите засегнати страни е она кое ќе не одведе до најсоодветното решение кое е во интерес на работниците. Очекувам уште утре да имаме решение за покачување на минималната плата. Како што ветив, ефикасно ќе ги решаваме сите прашања во интерес интерес на граѓаните и ќе ги исполнување ветувањата. Тоа е принципот и духот во кој ќе се решаваат сите прашања кои целат кон подигање на животниот стандард на граѓаните“, напиша Ковачевски.

На последниот економско-социјален совет, кој се одржа во петокот доцна попладне, Владата, синдикатите и работодавачите не постигнаа договор за зголемување на минималната плата на 18.000 денари.

Од Сојузот на синдикатите на Македонија дека нема да отстапат од своите барања – минимална плата во нето износ од 18.000 денари, скалесто зголемување на сите останати плати, како и регрес за годишен одмор за сите вработени во јавниот сектор. Највисоките тела на Синдикатот веќе донесоа одлука за штрајк, како и други видови на искажување на незадоволсто, како протести, блокирање на улици и институции, не само во главниот град, туку и во сите други градови од внатрешноста.

„ССМ е веќе во штрајк поради немање слух од работодавачите и срамните предлог решенија кои ги вадат на секој ЕСС за да купуваат време кое ние го немаме“, наведоа во соопштение од ССМ.

Инаку, седницата на Економскиот совет во Владата ќе се одржи денеска во 19 часот. На неа се очекува да биде разгледано синдикалното барање за зголемување на минималната плата, како и најновиот предлог на Бизнис конфедерацијата да се субвенционира дел од зголемувањето на минималната плата.

Измените на Законот за минимална плата, предложени од двајца пратеници, по скратена постапка влегуваат во Парлементот на Седницата закажана за во четврток во 11 часот. ССМ пак најавија дека во истото време ќе организираат мирен собир пред Собранието и ќе побараат од народните избраници да ги поддржат законските измени. Доколку и тоа не се изгласа, најавија штрајк со блокади на фабрики, слободни економски зони, институции, патишта.

(Б.Б.)