Владините препораки за заштита од коронавирусот остануваат на сила и за текот на оваа недела. Викендов беа откажани јавни собири, како и карневалите во Прилеп и Струмица. Нов потврден случај на коронавирус во земјава нема, а жената со дијагностициран Ковид-19 на Инфективната клиника е во добра здравствена состојба.
Владата во петокот излезе со препорака за откажување на поголемите јавни собири, спортски настани, културно-уметнички и забавни манифестации. Препораката важи до 6 март за сите активности, особено за оние за кои се очекува присуство на голем број граѓани и на кои се очекуваат гости од странство. Беа откажани Струмичкиот карневал и Карневалот „Прочка“ во Прилеп, а повеќето спортски настани се одржуваа без присуство на публика.
Останува на сила и препораката до компаниите и до институциите да не дозволуваат на лицата кои во овој период биле во Италија да одат на работа и ги потсети да останат во изолација во домашни услови 14 дена, период колку што трае инкубацијата на вирусот, како и препораката да не се патува во земјите каде има епидемија, без некоја поголема потреба.
Властите смируваат дека нема простор за паника, бидејќи ситуацијата будно се следи од страна на експертите епидемиолози од Комисијата за заразни болести. Ги уверуваат граѓаните дека сите мерки што се преземени од надлежните институции ги постигнаа очекуваните резултати и дека превенцијата и контролата за спречување на ширењето на коронавирусот се остваруваат целосно.
Граѓаните треба да ги почитуваат препораките за заштита од коронавирусот, меѓу кои и задолжително и често миење на рацете со сапун и вода и тогаш кога не се видливо нечисти или да се користи чистач за раце што содржи алкохол, а при кашлање или кивање да се заштитат устата и носот со марамче или со дланката. По употреба, марамчињата да се фрлаат во затворени канти, а при кашлање или кивање, како и при грижа за болни, задолжително да се мијат рацете.