За влез во објектите од денеска e потребен сертификат со примени две дози на вакцина или потврда за прележан ковид-19 во последните 45 дена, сметајќи од денот на оздравување. Министерството за здравство (МЗ) апелира до граѓаните да ги почитуваат мерките, да бидат одговорни и да се вакцинираат.
Ги повикуваме граѓаните кои сѐ уште не се вакцинирани, што побрзо да го направат тоа. Само со колективен имунитет може да го победиме вирусот, соопштија вчера од МЗ, откако објавија за новите измени за влез во објекти.
Министерот за здравство, Венко Филипче во петокот изјави дека засега нема да има препорака за нови рестриктивни мерки, бидејќи сегашните се сосема доволни, но дека треба да се почитуваат. Носење на маски, одржување на дистанца, често миење на раце и вакцинирање, како што посочи Филипче, се основните принципи на кои се темелат сите мерки во борбата со пандемијата.
Засега остануваме со истите мерки и апелираме сите да се придржуваат до нив. Доаѓаат семејни слави и апелирам граѓаните и оваа година како и претходните, ако можат да не ги организираат или да ги организираат во помал семеен круг. Сепак такви поголеми собири каде не се почитуваат мерките се ризик за епидемиолошката состојба да се влоши, рече Филипче.
Според вчерашните податоци, регистрирани се нови 285 случаи на ковид-19 од направени 2.667 тестирања. Речиси половина од новите случаи беа во Скопје – 110, по што следуваа Битола – 30, Прилеп – 24, Кочани – 20, Велес – 17, Куманово – 16, Тетово – 10, Кавадарци – 9, Гевгелија – 8, Неготино – 7, Ресен – 5, Штип, Охрид, Кичево и Свети Николе – по 4, Демир Хисар и Пехчево – по 3, Богданци – 2, Струмица, Делчево, Виница, Пробиштип и Кратово – по 1.