На денешната прес-конференција, Трајче Димков од ВМРО-ДПМНЕ соопшти дека пратеничката група на ВМРО-ДПМНЕ ќе достави до Собранието предлог за организирање референдум за граѓаните да се изјаснат за Договорот за пријателство и добрососедство кој новата влада предводена од СДСМ го склучи со Бугарија.
„Владата на СДС во крајно нетранспарентен процес склучи Договор за пријателство и добрососедство со Бугарија кој што е небалансиран односно предизвикува обврски само за нашата држава без да предвиди никакви отстапки од бугарска страна“, рече Димков, потенцирајчи дека ваквата одлука била донесена врз основа на последната седница на Извршниот Комитет на ВМРО-ДПМНЕ.
Димков потенцираше дека партијата бара народот да го одобри договорот пред Парламентот да го ратификува.
„Имајќи ја предвид важноста на овој договор, отстапките направени во него од страна на власта во Македонија, и последиците кои ќе бидат долгорочни и поприлично ќе го надминат векот на постоење на оваа влада, демократски е, и би рекле највисок демократски и морален чин е да се даде можност за изјаснување од страна на сите граѓани на Македонија, пред членовите на Парламентот да го усвојат овој меѓународоен договор, и тој да стане валиден“, рече Димков.
ВМРО-ДПМНЕ имаат сериозни забелешки на неколку членови од договорот, а најконкретно во деловите со кои декларирајќи постоење на заедничка историја се предвидува и создавање меѓу државна комисија која ќе ги дискутира промените на учебниците по историја во Македонија.
„За ВМРО-ДПМНЕ неприфатливо е откажувањето од македонското малцинство во Бугарија, а непотребно е повторно прифаќање на именувањето на нашиот македонски јазик, како јазик од Уставот на Македонија, дефиниција која не постои во ниту еден друг договор на Македонија и Бугарија со било која земја во светот, и очигледната намера преку оваа формулација за непризнавање на македонскиот јазик“, рече Димков.