ВМРО ДПМНЕ денеска побара смена на Јавниот обвинител на РМ Љубомир Јовески, истакнувајќи дека „Јавното обвинителство мора да се тргне од прегратките на Заев и од криминалниот клан и конечно да почне да си ја врши функцијата за која што е овластено, а тоа е гонење на криминалот“.
-За денот на гласањето посочивме на низа нерегуларности, аргументирано и со докази за кршење на молкот, лажно претставување, злоупотреба на телефонски броеви, кол центри на СДСМ, потоа основано сомнение за полнење на кутии, лажирање на резултати, насилство врз набљудувачи, а од него, од ЈО Јовески – ниту глас! ВМРО-ДПМНЕ постојано поднесува кривични пријави за кривични дела против изборите, за кои ЈО треба само по службена должност, екс официо, веднаш сами да отворат истрага! Ама, Јавниот обвинител го нема. Сите нерегуларности во врска со референдумот сите индиции за криминални изборни дејства мора да бидат истражени. Но за тоа е потребен избор на нов Јавен обвинител по предлог на опозицијата. Треба брза смена на Републичкиот Јавен Обвинител, се вели во соопштението од опозициската партија.
Исто така од ВМРО ДПМНЕ наведуваат дека Јовески не реагирал ниту на поднесената кривична пријава против Зоран Заев за поткуп и поттикнување поткуп во изборни цели, за изјавата од трибината во Крива Паланка поднесена од опозициската партија во септември.
Од СДСМ реагираа дека ваквото барање „е уште еден обид за барање амнестија за криминалите на Никола Груевски“.
-Во клучен период за иднината на државата, Мицкоски уште еднаш покажува дека не му се важни ниту граѓаните, ниту државата. Единствено Мицкоски се грижи за амнестијата на неговиот Никола Груевски. Мицкоски сака да ја загрози иднината на Македонија со постапки кои се против интеграцијата на Македонија во ЕУ и НАТО. Мицкоски, исто како и Ѓорге Иванов е под контрола на Груевски. Мицкоски, Иванов и Груевски треба да знаат дека нема амнестија за никого. Секој кој постапувал незаконски ќе мора да се соочи со одговорност, се вели во соопштението реакција од владејачката партија.