ВМРО-ДПМНЕ најстрого го осудува вандалскиот чин на сквернавење на бистите на Анте Поповски и на Славко Јаневски во Струга.

Ваквите сквернавења на споменици и бисти на личности од значење за македонската историја, култура и литература се директно инспирирани од Зоран Заев, кој во изминатиот период покажа негрижа кон истите, но и сам повикуваше и сквернавеше одредени споменици, се вели во реакцијата на опозициската партија.

Од ВМРО-ДПМНЕ додаваат дека „Заев не ги почитува великаните кои со својот живот и дело се вградиле во колективната меморија на овој народ“.

Со реакција за вандалскиот чин во Струга се јави и Тодорче Тасевски, директор на Струшките Вечери на Поезијата (СВП).

Најостро го осудуваме вандалскиот чин на сквернавење на бистата на еден од најистакнатите македонски поети Анте Поповски, којашто беше откорната и фрлена во крајбрежјето. Настанот е пријавен во полиција, извршен е увид и очекуваме сторителот да биде најден и против него да биде поднесена пријава. Апелираме за елементарна почит кон ликот и делата на македонските поети што се вградија во основањето на еден од најпознатите светски поетски фестивали. Не сакаме да претпоставиме дека аналфабетите вандали што го извршија овој чин воопшто имаат претстава дека денес, на 1 октомври се навршуваат 18 години од смртта на Анте Поповски, напиша Тасевски на Фејсбук.

Директорот на СВП додаде дека бистата на Поповски привремено ќе биде отстранета за да се извршат потребните технички зафати за нејзино поцврсто фиксирање на постаментот за да се оневозможат ваквите вандалски чинови