Во рамките на 102.седница и без присуство на пратениците од СДСМ и ДПА, Собранието на Република Македонија со 63 гласа „за“ и без воздржани и против донесе дополнување на Законот за помилување, со кој на Претседателот на државата му се дава можност да го поништи помилувањето дадено без претходна постапка за помилување во рок од 30 дена од денот на донесувањето на овој Закон при што претседателот не е должен да ја образложи одлуката.
Со дополнувањето на овој Закон лицето за кое е донесена одлука за помилување ќе има право до Претседателот на Републиката да поднесе барање за поништување на одлуката за негово помилување, а тој е должен во рок од 30 дена од денот на поднесувањето на барањето да ја поништи донесената одлука.
*Хојт Ји: Селективна аболиција би донела продлабочување на кризата
*Заев: Селективна аболиција не може да има
*Холандско МНР:Фер и демократски избори и итно повлекување на аболиција
Пратениците го донесоа и Законот за заштита на приватноста по скратена постапка, со кој се утврдува заштита на приватноста на граѓаните на Република Македонија гарантирана со Уставот и Европската конвенција за човекови права во врска со материјалите кои произлегуваат од незаконско следење на комуникации извршени во периодот од 2008 до 2015 година.
Со Законот се утврдува забрана за поседување, обработка, јавно објавување на материјалите кои претставуваат повреда на приватноста, на личниот и семеен живот. Со Законот се утврдува и забрана за поседување, обработка, јавно објавување и располагање на кој било начин со материјали кои произлегуваат од незаконско следење на комуникации извршени во периодот од 2008 до 2015 година вклучувајќи и нивно користење и располагање во изборен процес, политички и други цели и постапки.
Со 65 гласа „за“, без воздржани и против, пратениците го дополнија и Законот за заштита на личните податоци по скратена постапка, а кој предвидува уредување на обработката на личните податоци што се содржани во судските одлуки. Со предложеното дополнување на одредбата обработката на личните податоци што се содржани во Избирачкиот список ќе се врши под услови утврдени со Изборниот законик и на начин пропишан со прописите донесени врз основа на тој Закон.
Со 67 гласа „за“ на денешната седница е донесен и Законот за изменување на Изборниот законик по скратена постапка, со кој се предвидува допрецизирање на одредбата во членот 31 став 2 точка 28в во делот на обезбедувањето на електронски пристап до Избирачкиот список. Со предложените решенија во Изборниот законик ќе се овозможи ДИК да обезбеди електронски пристап до Избирачкиот список согласно со овој Законик и на начин пропишан со прописите донесени врз основа на овој Законик.
Сите овие четири закони беа поднесени од пратениците Талат Џафери и Илија Димовски.