ВМРО-ДПМНЕ ниту денеска не испрати информации, ниту пак сакаше да сподели повеќе детали со јавноста околу средбата на лидерот на партијата, Никола Груевски со германската канцеларка Ангела Меркел. НОВА ТВ денеска го контактираше портпаролот на партијата Иво Котевски за повеќе информации, но тој ни одговори дека на оваа тема нема да има ниту соопштение, ниту изјава.
„Единствени информации се оние кои ги објавиле медиумите кои сами дознале нешто, нема ништо повеќе“, рече Котевски.
Порталот „Курир“, повикувајќи се на порталот „Прес 24“ вчера објави дека Груевски на маргините на Конгресот на ЕПП во Малта се сретнал со Меркел. Според порталот на оваа средба присуствувал и претседателот на Комитетот за надворешни работи во европскиот парламент и прв потпретседател на ЕПП, Дејвид Мекалистер и неколку други нејзини соработници.
„На средбата, како што дознава Прес24 претставниците на ВМРО-ДПМНЕ ја објасниле актуелната политичка ситуација во Македонија, предизвиците со кои се соочува земјата и политичката криза, како и можните решенија за излез од неа и движење на земјата напред кон НАТО и ЕУ. Според информациите, двете страни размениле свои видувања за состојбата и мислења за можните опции за понатаму“, пишува Курир.
Инаку вчера од партијата преку соопштение информираа дека Груевски остварил неколку средби во Малта, но средбата со Меркел не е спомната во соопштението.
„Лидерот на ВМРО-ДПМНЕ, Никола Груевски, го искористи гостувањето на Конгресот на Европската Народна Партија (ЕПП) за да оствари средби и разговори со лидерите во Европа, Претседателот на Европскиот Совет, Доналд Туск и со Претседателот на Европскиот Парламент, Антонио Тајани, со премиерот на Унгарија, Виктор Орбан, со Јанез Јанша од Словенија, со домаќинот на Конгресот и самитот на ЕПП на Малта, претседателот на Националната партија на Малта, Симон Бустил, со федералниот министер за земјоделство на Сојузна Република Германија и секретар за финансии на ЕПП Кристијан Смид, со европратениците Ебер Брок и Алојз Петерле, со поранешниот премиер на Италија и лидер на партијата Форца, Италија, Силвио Берлускони и уште десетина други формални и неформални средби“, пишува во соопштението на ВМРО-ДПМНЕ.