Според ВМРО-ДПМНЕ, СДСМ и Сорос на демократски избори биле поразени од народот кој ја увидел нивната политика на насилство и кризи, а граѓаните се сведоци, тврди партијата на Груевски, на обидите вандализмот на Сорос да станел секојдневие во повеќе земји.
– СДСМ/СОРОС беа поразени во Македонија. Народот на демократски избори ја порази нивната политика на насилство, деструкција и кризи. Сорос беше поразен и во САД. Сведоци сме на обидите вандализмот на СОРОС да стане секојдневие во повеќе земји. Тоа веќе не минува. Граѓаните ги прочитаа скапо платените револуционери. Чадорот веќе не може да ги сокрие и заштити, се вели во соопштението на ВМРО-ДПМНЕ.
Партијата тврди дека организациите кои ги финансирал СОРОС за јакнење на некакви капацитети, всушност билe организации преку кои се плаќаат таканаречените револуционери за поттикнување насилства.
– СОРОС во Македонија до сега има доделено стотина милиони евра на сателит организациите кои ги раководи. Преку нив се финансираше и платеничката револуција, која ја напаѓаше полицијата и уништуваше се што е изградено. СДСМ е одработувачот на сценаријата на СОРОС, а тие се негови финансиери, се вели понатаму во соопштението.
Оттаму велат „нови 9.5 милиони евра се делат од касата на СОРОС/СДСМ во Македонија“.
– Секој обид овие средства да се употребат за подривање на нашиот правен и уставен систем ќе наиде на соодветен одговор. Народот ќе се спротистави на хулиганите на СДСМ/СОРОС доколку помислат да го реализираат нивното деструктивно сценарио. Хулиганите на СДСМ/СОРОС преку насилните протести во Скопје, кои на ист начин беа финансирани, повредија 50-тина полицајци и предизвикаа штети тешки милиони евра, тврди ВМРО-ДПМНЕ.
Партијата со која раководи Никола Груевски потенцира дека „десороизацијата е неизбежна, а узурпацијата и заложништвото на граѓанскиот сектор и демократијата мора веднаш да прекине“.