Ниту пред, ниту по Штип не сум користел службено возило за никакви други цели освен за работните обврски во Министерството, изјави првиот човек на здравство, Венко Филипче, како одговор на приговорот на ВМРО-ДПМНЕ до Државната комисија за спречување на корупција (ДКСК) за наводна злоупотреба на службено возило на Министерството за здравство за партиски цели.
Во реакцијата, министерот Филипче појаснува дека на 28 јуни бил во посета на болницата во Штип која од почетокот на корона-кризата функционира како регионален Ковид центар, а притоа посетил и градинка во градот. На настанот, како што потенцира, патувал со возило што на почетокот на кризата било доделено на Министерството за здравство од Агенцијата за разузнавање со договор за користење и не е службено на Министерството.
„По завршување на дневните обврски, пред заминување за Скопје, во својство на претседател на здравствената комисија на СДСМ бев на настан на кој ја презентирав здравствената програма на коалицијата „Можеме“. Бев уверен дека постапувам согласно законот, дека нема апсолутно никакви прекршувања и доколку се утврди спротивното се извинувам за ненамерниот превид. Образложението за ова ќе го доставам и до претседателот на Владата, Оливер Спасовски“, вели Филипче.
Тој посочува дека сите посети на јавно здравствените установи низ земјата во овој период се во насока на согледување на состојбите во установите, начините на кои тие се справуваат со корона-кризата, предизвиците со кои се соочуваат здравствените работници и можностите за унапредување на целокупниот здравствен систем во справување со ковид-19.