ВМРО-ДПМНЕ преку својот претставник Драган Данев, денеска ги обвини Зоран Заев и СДСМ за ултрадесничарство.
На прес-конференција, Данев потенцираше дека логото на СДСМ било инспирирано од српските ултрадесничари – Двери.
– Освен пазарењето со највисоките национални интереси како обид да се придобијат гласовите на етничките Албанци, СДСМ нема никаква конкретна програма и проекти со кои ја бара поддршката од граѓаните. Како и на сите претходни избори, СДСМ повторно излезе со памфлет во кој нудат се и сешто само за да добијат некој глас повеќе и да се спасат од катастрофалниот пораз. Овие избори, безидејниот Заев, отиде и чекор понатаму крадејќи го главното мото на неговиот памфлет од мотото на српското ултрадесничарско движење Двери, изјави Данев.
Како што рече тој, српските ултрадесничари излегле со ветување за реформа во Изборниот законик а истото го направил и Заев.
– Српските ултрадесничари најавија преиспитување на функцинирањето на новите правосудни професии како нотари и извршители. Исто како Заев. Српските ултрадесничари најавија зголемување на даноците. Исто како што најави и Заев. Истите флоскули кои ги користат Двери ги користи и СДСМ. „Нема живот без слобода“, „Да ја вратиме државата на народот“, „Мора да се исполни правдата во Србија“ се дел од слоганите што ги слушаме од Заев низ Македонија, а што претходно ги слушаа и граѓаните во Србија, дополни Данев.
Тој го обвини СДСМ дека додека Двери се залагале за забрана на промоција на хомосексуалноста на малолетни лица и за борба против антисемејната идеологија, СДСМ целосно ја изоставиле оваа тема бидејќи кокетирале со ЛГБТ популацијата.