Published: Sunday, December 12, 2021 12:15
Гласањето на денешните вонредни внатрепартиски избори за претседател на СДСМ се одвива непречено и без застој. Сите 194 гласачки места во 80 општини се отворени навремено, во 8 часот, а избирачките места ќе бидат отворени до 19 часот, информираше на прес-конференција претседателката на партиската Централна Изборна Комисија, Викторија Мадиќ.
Таа додаде дека за три часа од отворањето на сите избирачки места излезноста е 12 отсто.
СДСМ постави нови највиски стандарди на македонската политичка сцена. Денеска се одржуваат вонредните внатрепартиски избори за претседател на СДСМ. Гласањето на сите гласачки места се одвива непречено, без застој, во демократска атмосфера и со почитување на мерките за заштита од ковид-19, истакна Мадиќ.
Како што посочи, членовите кои не успеале да се регистрираат за време на предвидениот рок, денеска ќе можат да се регистриаат на гласачките места ои да го остварат своето право на глас. Мадиќ појасни дека сите членови на СДСМ со електронска членска картичка имаат право на глас.
„Гласачките места ќе бидат отворени до 19 часот, до кога и трае гласањето. По затворањето на гласачките места и по обработка на пристигнатите податоци вечерва ќе се обратиме повторно до јавноста со сумарни информации, по што ќе ги соопштиме и резултатите од вонредните внатрепартиски избори“, рече Мадиќ.