Косовската полиција соопшти дека во соработка со државните органи за безбедност во регионот осуетила и спречила обид за синхронизирани терористички напади на т.н. Исламска држава на Косово, во Македонија и во Албанија. Меѓу одбраните мети бил и фудбалскиот меч меѓу Албанија и Израел во квалификациите за светското првенство во 2018 година што се одигра пред пет дена. Медиумите пишуваат дека интернет комуникацијата на терористите била пресретната од француската разузнавачка служба која веднаш ги известила МОСАД, израелска тајна полиција и со случајот беа запознати албанските безбедносни органи.
Веднаш следуваше реакција и од фудбалската федерација на Албанија која го премести натпреварот од Скадар во Елбасан, град на педесетина километри јужно од Тирана. Нејзиниот портпарол Тритан Кока, во првиот момент, одби да ги каже причините за таквата одлука, а и канцеларијата на државниот обвинител на Албанија остана нема на информациите за терористичките напади што се подготвувале.
Во полициска акција на Косово се лишени од слобода 19 лица и уште шест во Македонија и во Албанија. Според некои медиуми, еден од нив бил државјанин на Република Македонија. Кај нив е пронајдено оружје, експлозив и електронска опрема, пренесува агенцијата АП. Членовите на групата во трите земји биле координирани од двајца Албанци, членови на Исламска држава, кои имале јасни цели кој, кога и каде треба да биде нападнат, наведе косовската полиција.
Дека полициите од регионот спречиле низа терористички напади за време на мечот меѓу Албанија и Израел, пред два дена, потврди и косовскиот претседател Хашим Тачи. Израелските медиуми посочуваат дека мозок на планираниот напад на нивните фудбалски репрезентативци бил Лавдрим Мухаџери, Албанец од Косово познат под воено име Абу Абдла ал Косово, кој во последните неколку години беше активен на боиштата во Сирија и Ирак.