Во среда, на осми ноември Кривичниот суд треба да ја соопшти пресудата за вкупно седум обвинети во случајот Тврдина 2.
Денеска, во завршните зборови, обвинителката на Специјалното јавно обвинителство, Ленче Ристоска за првообвинетиот Горан Грујевски побара максимална затворска казна која за ова дело изнесува пет години.
Таа побара судот да ги цени отежнителните околности, односно тоа што обвинетиот иако знаел дека судската постапка е во тек, избегал.
За останатите шестмина обвинети, службенички во Управата за безбедност и контраразузнавање, Ристоска побара алтернативна казна и побара судот да ги цени отежнителните околности како тоа што ниту една од нив не се покајала за делото, но и олеснителните околности како тоа дека ниту една од обвинетите нема никаква дамка во службата во претходното работење.
Обвинетите, во своите завршни зборови пред судијката Лидија Петровска рекоа дека не се чувствуваат виновни затоа што се што направиле било по наредба на претпоставениот, поранешен началник на Петтата управа, Горан Грујевски.
„Во УБК сум долги години и секогаш својата работа сум ја работела професионално без никакви забелешки. Секогаш сум ги почитувала наредбите на претпоставените, што стои како опис на моето работно место и сакам да кажам дека и во овој случај постапував исклучиво по наредба на претпоставениот началник“, рече една од обвинетите.
Со овој исказ се сложија и останатите пет обвинети во овој случај.
Ристоска во своето излагање рече дека мотивот за уништувањето на документацијата е очигледно и јасно – „да се уништат доказите за лицата кои го правеле прислушувањето”.
„Во текот на постапката успеавме да докажеме дека обвинетите ја уништиле документацијата поврзана со системите за прислушување. Обвинетиот Горан Грујевски презел низа незаконски дејствија. Тој немал законска надлежност да формира комисија за ништење на документите. Според Законот за архивско работење, Државниот архив мора да даде одобрение за ништење на документите“, рече Ристоска.
Таа рече и дека ова се докажало со низа дописи кои Грујевски ги испратил до комисијата, а и тие ги враќаат до него. Исто така, Ристоска рече дека не постои барање до Архивот за ништење на документи.
Како што рече обвинителката, биле ништени документи од 2007 до 2015 година, што значи дека не станувало збор за годишно ништење на документи.
„Намерата да се сокријат докази доаѓа и од фактот дека процесот на ништење на документацијата започнал во исто време со ништењето на системите за прислушување. УБК нема посебна процедура за ништење на материјали, што значи требало да ангажираат фирма за ништење, а не документите да ги палат во базата во Петровец“, рече Ристоска.
Адвокатот на Грујевски, Љупчо Шврговски побара судот да ги ослободи обвинетите од обвиненијата, бидејќи во овој случај не постои кривично дело, додека адвокатите Миле Петровски и Петар Василев во своите завршни зборови ја спореа надлежноста на СЈО за овој случај.