Бројот на потврдени случаи на мајмунски сипаници ширум светот достигна 291, но заразата  не е ендемична. Ова се вели во извештајот на Европскиот центар за превенција и контрола на болести, пренесе АФП.

Повеќе од десет земји, претежно во Европа, каде што овој вид сипаници се ретки, потврдија најмалку по еден случај.

„Ова е првпат во Европа да бидат пријавени заразени луѓе без познати епидемиолошки врски со Западна или Централна Африка, каде што болеста е ендемична“, се вели во извештајот.

Повеќето случаи на инфекција се кај млади мажи кои се идентификуваат како мажи кои имаат секс со мажи.

Во Велика Британија, каде мајмунските сипаници првпат беа откриени на почетокот на мај, бројот на потврдени случаи е 71. Следува Шпанија со 51 случај и Португалија со 37. Надвор од Европа, има 15 во Канада и девет во САД.

Вкупниот број случаи денеска е петкратно зголемен од 20 мај кога ЕУ објави дека се регистрирани 38 случаи.

Ризикот од инфекција е „многу низок“, соопшти Европскиот центар за превенција, но предупреди дека луѓето кои имале повеќе сексуални партнери – без оглед на сексуалната ориентација – се повеќе изложени на ризик.

Мајмунските сипаници моментално се ендемични во 11 земји во Западна и Централна Африка.

Моментално не постои лек за мајмунските сипаници, но симптомите обично исчезнуваат по две до четири недели.