Во Кривичниот суд денеска треба да продолжи судењето во случајот „Труст“ на Специјалното јавно обвинителство“ во кој обвинети се Сеад Кочан, Василие Авировиќ и Сафет Ватиќ, како и фирмите „Трансмет“, Силекс“ и „Вато“ ДООЕЛ.
Според обвинението, тие здружени во конзорциум доставиле фалсификувани документи за сопственост на механизација и за кадровска екипираност со крајна цел да добијат тендер на ЕЛЕМ вреден над 17 милиони евра за ископ на јаглен во Суводол.
Минатата недела почна главната расправа во овој судски процес при што сите обвинети се изјаснија за невини.
На последното рочиште пред два дена започна и изведувањето на докази, а како сведок во судницата беше сопственикот на фирмата „Фичо Сервис“ од којашто „Трансмет“ на Кочан ги купувала градежните машини. Обвинителите од СЈО тогаш предочија договори и фактури кои биле дел од тендерската документација, но сопственикот на „Фичо Сервис“ можеше да потврди дека од него била купена само една машина. За останатите, за кои обвинителите му ги покажаа и фактурите, кажа дека фактурите и меморандумите се негови, но не може да го потврди потписот на нив, ниту пак, е сигурен дали се реализирале. За потписите велеше дека „не се гледаат добро“, „личи на неговиот“, како и дека „низ годините го менувал потписот“.
На истото рочиште во судницата требаше да сведочи уште еден сведок, управник од „Силекс“, но не се појави, па се очекува тој да се појави на денешното рочиште на кое исто така ќе се изведуваат докази.