Денес во Варшава повторно протест поради обидите на власта да го наруши владеењето на правото. Од 25.000 до 30.000 луѓе се собраа во полската престолнина на повик на Комитетот за одбрана на демократијата (КОД) кои ја обвинуваат конзервативната влада на партијата Право и правда дека се обидува да го парализира Уставниот суд и подготвува закон со кој абортусот би бил тотално забранет. Полска има закон за абортус, еден од најстрогите во Европа.
Во ноември 2015 година владата го смени начинот на именување на членовите на Уставниот суд а во декември истата година и начинот на негово функционирање со што роди сомнеж дека сака да ја наруши неговата независност.
Адам Мичник, интелектуалец левичар и историска фигура на антикомунистичката опозиција, а денес директор на весникот Газета Виборчша, им порача на конзервативците од власта дека не смеат да го нарушуваат Уставот.
“КОД не сака да ја урне власта… Движењето би сакало владата на Јарослав Качински да ги почитува правото и Уставот. Но доколку не ги почитува, општеството има задача да го тргне од власт и тоа преку демократски избори”, рече Мичник.
Дисидентот Мичник додаде дека не може да се прифати политика која води кон изолација на Полска и конфликт со соседите.
ЕУ е загрижена за развојот на настаните во Полска од истите причини како и оние на движењето КОД. Европскиот парламент ја критикуваше Полска токму поради парализата на Уставниот суд и усвојување закони со кои се нарушува владеењето на правото.
Во Варшава денес имаше два протести. Освен овој на КОД, на улица излегоа и илјадници лекари, болничари и технички персонал барајќи зголемување на буџетот за здравството.