Возило со изборен материјал од вчерашното гласање во Општина Гостивар пламна утрово во движење на пат кон Скопје. Причините за инцидентот засега се непознати, но она што се знае е дека нема повредени во настанот, ниту пак се оштетени гласачките ливчиња што го потврди портпаролот на СВР Тетово, Марјан Јосифовски.
„Утрово во 4:30 часот во СВР Тетово бeше пријавено дека моторно возило „форд транзит“ со гостиварски регистарски ознаки, управувано од 35 годишниот Ф.А. од Гостивар, се запалило во движење во непосредна близина на наплатната станица Тетово. Во возилото се наоѓале петмина членови на Општинската изборна комисија Гостивар кои го превезувале избирачкиот материјал во Скопје. Материјалот воопшто не бил оштетен и бил префрлен во друго возило и испратен во Државната изборна комисија“, соопшти Јосифовски.
Лицето Ф.А. во еден момент, додека управувал со возилото, забележал како излегува чад под хаубата. Заедно со четворицата членови од општинската изборна комисија го излегле од возилото во близина на наплатната рампа Тетово и од безбедносни причини решиле да повикаат друго возило за продолжување на патот до Државната изборна комисија во Скопје.