Втора доза на „Астра Зенека“ во земјава ќе можат да примат постарите од 60 години, а за таа цел ќе биде отворен и сајт за ревакцинација, потврди денеска министерот за здравство, Венко Филипче.
Тој додаде дека неговиот српски колега, Златибор Лончар, го информирал дека нема да може да се испорачаат вакцините „Астра Зенека“ за ревакцинација на македонските граѓани кои ја примија првата доза во Србија. Сајтот на кој овие граѓани ќе треба да се пријават за да ја примат втората доза кај нас е „ ревакцинација.мк“
Но, како што најави Филипче, сите сертификати од вакцинација од Србија се валидни и со сите спецификации коишто ги бараат на граничните премини. Во завршна фаза е апликацијата со потребните кодови.
Филипче денеска изјави дека има околу 230 илјади дози вакцини за ревакцинација. А за прва доза на вакцина останале помалку од 10 илјади вакцини.
Темпото на вакцинација од околу 10 илјади граѓани дневно се очекува да продолжи од следната недела кога треба да пристигне поголемо количество на вакцини – 20 илјади се донација од Грција и 50 илјади вакцини од Бугарија.
Во јуни се очекуваат и вакцини од Фајзер преку директниот договор со производителот, кинески и вакцини преку Ковакс механизмот.
– Во јуни, согласно бројот на пријавени граѓани и согласно пријавени по вработени во критичната инфраструктура, преку стопанските комори со коишто денеска имавме состанок, верувам тоа темпо ќе биде како што беше до почетокот на оваа недела, односно до крајот на минатат – рече Филипче.