Нова интернационална станица во фудбалската кариера на Милован Петровиќ (29). По Осиек, романски Сепси и грчка Лариса, играчот за врска продолжува во екипата на Сутјеска. Со црногорскиот првак се договори за едногодишна соработка, но нема да биде во комбинација за реваншот со кипарски Аполон во квалификациите за Лигата на шампиони (ЛШ). За екипата од Никшиќ ќе може да дебитира во наредната фаза за ЛШ или за Лига Европа.
Фудбалските почетоци на Петровиќ се врзани за Тиквеш од Кавадарци. Потоа играше и за Победа за целосна афирмација да доживее во Работнички од каде во 2016 година направи трансфер во хрватскиот прволигаш, Осиек. Во првата сезона одигра 25 меча во кои постигна еден гол, а во втората беше испратен на позајмица во романски Сепси за кој, исто така, даде еден погодок во 29 средби. Во меѓувреме доби и девет покани за настап во македонската репрезентација.