Далеку сме од вистинската форма и далеку од онаа енергија што е потребна за Вардар да биде она што е. Можеби ова е добро предупредување, има уште многу за игра, изјави Веселин Вујовиќ, тренер на ракометарите на Вардар, по поразот од Еурофарм Пелистер во Суперкупот на Македонија.
Вујовиќ кажа дека нема забелешка за победата на Еурофарм Пелистер и дека ова е прв натпревар кој ги очекува од многуте во новата сезона.
Ќе се потрудиме да смениме некои работи, но некои играчи ќе мора добро да се замислат дали ќе можат да го носат дресот на Вардар, посочи тој и дополни дека по поразот од девет разлика не е задоволен од ништо, само од загревањето.
Варадаровото лево крило, Тимур Дибиров, изјави дека се разочарани, но, не поради поразот затоа што, како што кажа, сѐ уште е период на подготовки, туку поради начинот на кој што изгубиле.
Првото полувреме беше подобро но, не толку добро, во второто паднавме во играта. Во секој случај ваква „шлаканица” е добредојдена затоа што веднаш гледаме каде ни се грешките и на што треба да работиме, кажа Дибиров.
Дополни дека очекуваат тешка сезона и треба да ги кренат главите и да работат уште подобро отколку досега.
Еурофарм Пелистер го освои годинешниот ракометен Супер куп на Македонија откако вечерва го совлада Вардар со 31-22.