За повлекување на белоруски ракометар: Червар казнет со 3.000 евра

Лино Червар ја дозна казната во дисциплинската постапка што против него ја поведе Европската ракометна федерација (ЕХФ). Хрватскиот селектор е санкциониран со 3.000 евра за повлекување на противнички играч, непромислен гест што предводникот на „коцкестите“ го направи во синоќешниот дуел со Белорусија (25:23).

Паричната казна може да се окарактеризира и како симболична ако се знае дека Червар можеше да биде суспендиран до крајот на Европското ракометно првенство. Во образложението на ЕХФ за одлуката стои дека „дошло до благ контакт меѓу белоруски ракометар и Червар“ што е оценето како несоодветно и неспортско однесување.