Сторената штета во МНТ мора да се плати, ако тоа не го сторат „Шверцерите“, тогаш ќе плати директорката Симона Угриновска, беше одговорот на Зоран Заев на пратеничко прашање за време на денешната собраниска седница.
„Во МНТ се причинети два вида на штети – едната е материјална, другата духовна. Во делот на духовната штета, е тоа што културата никој не ја восприема на онаков начин на кој беше презентирана во МНТ, кој навистина бил отстапен за навивачката група по повод Денот на албанската азбука. Штетата мора да се надомести“, рече Заев кој и лично присуствуваше на првиот дел од вечерта во организација на Министерството за политички систем.
Во Македонскиот народен театар (МНТ) беше причинета материјална штета од, речиси, 4.000 евра по свечената Академија по повод 111 години од Денот на албанската азбука на 22 ноември. Најавата за прикажување на документарен филм од домаќините била сфатена дека е во контекст на официјалниот дел на вечерта, но наместо тоа, салата во објектот ја исполнија симпатизери на чаирскиот фудбалски прволигаш Шкупи (поранешна Слога Југомагнат), а проекцијата се однесуваше на нивниот јубилеј – 30 години од формирање на навивачката група „Шверцери“.
Епилогот од нивната „претстава“ беше скршени даскички од украсните лајсни, исечен тапацир, скокање по столчињата и штета од близу 4.000 евра или, поточно, 3,965 евра. Директорката на Македонскиот народен театар (МНТ), Симона Угриновска, со одлука на владина седница, е казнета со 15 отсто помала плата за период од три месеци со образложение за направен пропуст и давање на согласност за отстапување на МНТ без писмен договор. Притоа е задолжено Министерството за култура во соодветна постапка да наложи на директорката на МНТ од организаторите на настанот да побара надомест за направената штетата за време на настанот.