Со задоцнување од 40 минути на закажана прес-конференција, премиерот Зоран Заев денеска го претстави Предлог-буџетот за 2018 година.
Тој рече дека предлогот произлегува од реално направени проценки, а цел на Владата било да формира буџет со развојна компонента, за напредок во економијата. Заев рече дека овој предлог- буџет е голем чекор кој ќе придонесе за стабилност на економијата и Владата треба да гледа подалеку од една година.
„За прв пат предлог–буџетот беше објавен на јавна дебата со цел во консултација со јавноста да се знае каде се трошат парите на граѓаните. Буџетот ги обезбедува основните потреби, навремена исплата на плати, пензии, социјални трансфери. Во 2018 уште поизразено продолжуваме со кратење на непродуктивните трошоци и тие пари ги насочуваме за потребите на граѓаните“, рече премиерот Заев.
Тој додаде дека целта која ја поставила Владата за раст на економија од 3,2 проценти е базирана на реални основи и е во линија на проекциите на ММФ и на другите меѓународни релевантни финансиски институции.
„Во 2018 инвестираме во повисоки плати за образованието, здравството и детската заштита. Покачување од 5 отсто ќе има на платите за вработените во здравствените установи и образованието, градинките, како и десет проценти поголеми плати за сите припадници на армискиот состав. Планирани се 6,6 милијарди денари повеќе пари за тековни расходи и социјални трансфери кон граѓаните. Има пари и за законско порамнување на пензиите. Како што ќе растат платите ќе растат и пензиите“, рече премиерот.
Со предлог буџетот за 2018 година Владата предвидува 35,7 милиони евра за процесот на гасификација. Како што изјави денеска премиерот, Зоран Заев, тоа се околу 5 милиони евра повеќе од претходната година.
Во план е средствата да се инвестираат во изградба на мрежа кон Прилеп, Битола, Гостивар и Тетово.
„Гасификацијата продолжува онаму каде што застана. Ќе ја нападнеме Македонија со цевки од сите страни. Еден дел од парите ќе се вложат за експропријација, а еден дел за цевки. Ќе бидат отворени и повици до инвеститори за учество во јавни приватни партнерства“ посочи премиерот.
Предлог буџетот предвидува и 3,2 милиони евра за изградба на универзитетот „Мајка Тереза“, кој беше отворен од страна на претходната власт. Заев изјави дека во план е изградбата на објектот да започне со засилено темпо и дека ако има потреба ќе се издвојат повеќе средства за оваа намена.
Заев најави промена во јавните набавки кај институциите. Од први декември, рече тој, секој договор од државна институција ќе може да се реализира само ако прво се објави на веб страната на институцијата.
„Целта е да го направиме потранспарентно трошењето на јавните пари. Кај јавните набавки постои голема можност за корупција и ќе направиме се за да ја намалиме комплетно. Наша трајна определба е борбата против корупција. Десетици милиони евра можат да се заштедат на ваков начин“, рече Заев.
Освен тоа, Владата разгледува и воведување на мерка за секој повраток на ДДВ кај стопанството да биде јавно објавен како податок.
Тој истакна и дека се инвестира и во културни вредности, односно издвоени се 10 милиони денари за реконструкција на офицерскиот дом во Битола и исто толку за спомен обележјата на Тоше Проевски во Крушево.
„За седната година планирани се вкупно 988 милиони денари за активни политики на нови вработувања“, додаде премиерот Заев.
Премиерот Зоран Заев денеска изјави дека Македонија мора да биде подготвена за исчекор за прашањето за името, оценувајќи дека сега има поголеми шанси од порано да се изнајде решение со Грција.
– Со Република Грција имаме поголеми шанси од порано да изнајдеме решение. Очекувам дека до крајот на овој месец ќе почнат да се раздвижуваат работите, макар на преговарачите со Нимиц. Стојам на располагање и за премиерско ниво, министерот за надворешни работи е подготвен, веќе разговаравме со претседателот на државата. Во поглед на ова прашање Македонија мора да биде подготвена за исчекор конечно за решавање на ова прашање, рече Заев, одговарајќи на новинарски прашања.