Лидерот на СДСМ, Зоран Заев го поздрави формирањето на владиниот кабинет во Шпанија и упати честитки до старо-новиот премиер Педро Санчез за успешно завршената потрага по мнозинство во Сенатот за уште еден мандат.
„Честитки Санчез Кастехон за добиеното мнозинство за формирање на Влада. Шпанија продолжува прогресивно што ќе овозможи стабилност и правичен развој на Европа. Очекуваме навремена ратификација на нашиот протокол за НАТО и се радуваме што наскоро ќе бидеме 30 сојузник во Алијансата“, напиша Заев во постот на Твитер.
Формирањето на Владата во Шпанија е од исклучително значење за земјата која беше во исчекување на ваква вест од Пиринеите во изминатите два месеца. Тоа е последната земја-членка на НАТО која треба да го ратификува Протоколот за членство на Македонија во Алијансата, откако процедурата мина во сите останати 29 држави.
Честитки @sanchezcastejon за добиеното мнозинство за формирање Влада. Шпанија продолжува прогресивно, што ќе овозможи стабилност и правичен развој на Европа.
Очекуваме навремена ратификација на нашиот НАТО протокол и се радуваме што наскоро ќе бидеме 30 сојузник во НАТО. 🇲🇰🇪🇸
— Зоран Заев (@Zoran_Zaev) January 7, 2020
Поранешниот шпански премиер, во изминатите два месеца вршител на должноста и иден мандатар, Педро Санчез ја доби поддршката од пратениците во шпанскиот Сенат за состав на новиот владин кабинет. Со 167 гласа „за“, 165 „против“ и 18 „воздржани“ е ставен крај на, речиси, едногодишната криза во земјата што резултира со изборите во ноември.
Санчез успеа во намера да состави Влада по ветувањето за воздржаност на РКЕ, најголемата сепаратистичка партија во Каталонија, во замена за разговори во наредниот период за решавање на статусот на регионот. Дел од новата Влада на Шпанија, покрај Социјалистичка партија, ќе биде и партијата „Унидас Подемос“ на Пабло Иглезијас.