За дебата и различност се бориме, убаво е да постои дебата, па и а пратеничките листи на СДСМ, рече денеска на прес конференција Зоран Заев, лидерот на СДСМ одговарајќи на новинарско прашање.
„На нашите листи има и поранешни пратеници и нови пратеници. Нашите листи се авангарда во ова современо живеење, проткаени се со многу независни пратеници. Нашата цел беше да се отвори дебата и еве се отвори дебата за тие листи. Ние ги повикавме сите кои што навремено, порано покасно и дополнително ќе се одважат против режимот и сите се добредојдени да соработуваат со нас“, рече Заев.
Заев на заедничка прес конференција со Стево Пендаровски, носител на листата на избирачката единица 1 рече дека додека Груевски се бори парите од граѓаните да влезат во фамилијата, нивната борба е парите да влезат во џебот на граѓаните.
„Не може Македонија да ја има најбогатата партија во Европа и најсиромашните граѓани на Балканот. Преку мерките за зголемување на социјалната помош, преку правичното оданочување, преку повраток на 15 отсто од данокот за додадена вредност на граѓаните ќе се враќаат парите на многу внимателен и сериозен начин. Преку ваквиот концепт, наша цел е граѓаните да бидат побогати во Македонија, вели лидерот на СДСМ.
Тој додаде дека со овие мерки сакаат да се постигнат две главни цели, побогати граѓани и намалување на социјалните разлики во Македонија.
Пендаровски рече дека не е возможно да имате економски силна држава и граѓани, а да не постои правна држава.
„Имате случај како Македонија во кој не постои правна држава, а постои екстремно богата фамилија и сите останати се сиромашни или екстремно сиромашни. Апсолутен приоритет по победата ќе биде правната држава да биде вратена, да биде функционална, бидејќи Македонија денес не е правна држава, а тоа може да се оствари ако правото биде неселeктивно применувано“, рече Пендаровски.
Тој најави дека сите пари што се украдени од граѓаните ќе им бидат вратени, без оглед дали парите моментално се наоѓаат во Белизе, Јужна Африка или Чешка.