Премиерот Зоран Заев потврди дека вчера во Собранието имал средба со лидерот на ДУИ Али Ахмети. Како што рече денеска на прес-конференција, одговорајќи на новинарски прашања, станало збор за очекувањата од денешните разговори во Виена, за проширувањето на владината коалиција и за реформските закони.
На Владата, истакна Заев, и треба постабилно парламентарно мнозинство зашто следуваат сериозни одлуки за Македонија.
До 10 април, потенцира премиерот, се очекува да бидат именувани замениците-министри на испразнетите места, директорите на јавните претпријатија и државните секретари, а до 17 април да се донесат реформските закони предвидени со Планот 3-69.
– Вчера поголем дел од времето поминав во кабинетот на претседателот на Собранието Џафери зашто до 15 април сакаме да ги донесеме реформските закони. На 10 април повеќето ќе бидат на седница, а заклучно со 17-ти, кога треба да го добиеме извештајот од Европската комисија, очекуваме да бидат усвоени, рече Заев и додаде дека по извештајот, на 17 април очекува важни посети, на Могерини и Хан, за, како што истакна, убави работи.
Заев на прес-конференцијата уште еднаш апелира да се дозволи имплементација на Законот за употреба на јазиците, за кој претседателот Иванов одбива да го потпише.
– Да го пуштиме законот да живее за да видат сите дека нема ништо страшно во него и дека сме растоварани од какви биле предрасуди. Блокирањето значи дека некој се плаши законот да заживее, но кога ќе биде донесен сите ќе сфатат дека немало потреба и тоа било лага, рече Заев.
Според него, за законот има две опции или да оди пред Уставниот суд или она што го разгледуваат правните тимови во Собранието и другите институции.