Премиерот уверува дека имаме капацитет да ги сместиме Авганистанците.
Нашата земја знае што значи солидарност и колку е важно на солидарноста да се врати со исто таква солидарност и разбирање на трагедијата на луѓето, рече премиерот Зоран Заев во интервју за ТВ Сител на прашањето за одлуката Северна Македонија да прифати одреден број граѓани на Авганистан.
– Понудивме помош затоа што отсекогаш сме биле и ние солидарни и знаеме што значи солидарност. Граѓаните треба да се сетат дека Авганистан учествуваше во изградбата на Скопје после катастрофалниот земјотрес и учествуваше во изградбата на Универзалната сала. Во поново време авганистанските граѓани работеа со нашите војници во заложбите да се воспостави демократијата во оваа земја. Работеа на хуманитарните проекти во Авганистан и наша должност е сега да им помогнеме кога животот им е во опасност, рече Заев.
Тој додаде дека политикантски се коментарите дека нашата земја покажала повеќе волја од поголеми и побогати држави да ги прифати бегалците од Авганистан.
„Ова е прашање на вредности, на хумана определба да покажеме дека сме луѓе и дека имаме разбирање за страдањето на народот на Авганистан. Многу сум горд на тоа дека ќе им дадеме надеж на 450 до 500 или повеќе луѓе во неволја“, истакна Заев.
Премиерот вели дека сè уште не знае точно и колку има потреба да се примат луѓе од Авганистан, но вели дека имаме капацитети.
– Можеме 1.000, 1.200, 1.800 луѓе да примиме и слично. Во моментов сме потврдени со 450, додека разговараме веројатно се потврдуваме некои нови 70 исто така миротворци и хуманитарци, изјави Заев.