По неодамнешната средба со претседателот на ВМРО-ДПМНЕ, Никола Груевски, амбасадорот на САД во земјава, Џес Бејли денеска се сретна и со првиот човек на СДСМ, Зоран Заев.
Заев пред Бејли истакнал дека на изборите на 11.декември, граѓаните се определиле за добар живот, за слобода и за демократија, а тоа што граѓаните не подлегнале на манипулациите и на провокациите изминатите денови е потврда дека општеството е зрело за промени.
„Мнозинството граѓани во Македонија избраа промени на парламентарните избори. Мнозинската волја на граѓаните мора да биде почитувана. Република Македонија ќе добие влада што ќе работи во интерес на сите граѓани на Македонија. Деновите што претстојат ќе покажат дека почнатите демократски процеси во Македонија веќе никој не може да ги спречи“, рекол Заев на средбата со Бејли, на која присуствувале и заменик-претседателката, Радмила Шекеринска и генералниот секретар на партијата, Оливер Спасовски.
Бејли по средбата со Груевски најави вакви средби со политичките лидери.
Груевски оствари средби и со евроамбасадорот во земјава, Самуел Жбогар, и со норвешкиот амбасадор, Анре Санес Бјорнстад.
Веднаш по средбите, екс-премиерот во свое обраќање пред демонстрантите кои протестираа додека Државната изборна комисија ги разгледуваше партиските приговори по изборите, упати остра критика кон амбасадорите бидејќи „некои амбасадори почнале премногу да се мешаат во внатрешната политика на земјата“.