Не очекуваме раст на цените на струјата годинава заради соодветните политики што ги правиме за да направиме меко спуштање во либерализацијата во време кога приватните компании веќе се на слободниот пазар на електрична енергија и не можат да покријат дел од трошоците на домаќинствата, најави премиерот Зоран Заев денеска при презентацијата на Интервентниот план за инвестиции ИПИ 2021-2027 во Владата.
– Со стратегии поставени од државата веруваме дека ќе развиеме одлична стратегија која ќе предизвика сериозни инвестиции во фотонапонски електрани, ветерници и гасни централи, за да направиме транзиција на енергетскиот систем. Инвестициите во обновливи извори на енергија, секако, ќе ги чинат граѓаните зашто доколку сакаме здрава и зелена енергија, таа се плаќа поскапо и затоа државата ќе развие планови за помагање на сиромашните граѓани преку посебни програми, рече Заев.
Одговарајќи на новинарско прашање, премиерот појасни дека до 2035 или до 2040 година земјава има резерви на јаглен, зависно дали ќе се има ископи во нови јегленокопови или не.
-Во регионот веќе има и бесплатен јаглен и треба само да се плати транспортот за да се донесе. Грција ги затвора термоелектраните на јаглен, има јаглен од Косово којшто во моментов се носи во Осломеј. Убеден сум дека, во вакви околности, јагленот не е причината за затворање на РЕК Битола и РЕК Осломеј, туку здравата животна средина, рече Заев.
Тој додаде дека час поскоро треба да направиме инвестиции во фотонапонски централи, ветерни паркови и гасни електрани кои ќе продуцираат „илјадници мегавати електрична енергија, а нашиот народ е по зелената енергија“.