Премиерот Заев вели дека нема намера да врши притисок врз обвинителството за ослободување на притворените пратеници за инцидентите од 27 ми април, што ВМРО ДПМНЕ го поставува како услов за да се вратат во работата на Собранието. Заев вели дека законот треба да важи за сите подеднакво.
,,Ја разбирам позицијата на ВМРО-ДПМНЕ да не се враќа во Собранието сѐ додека не бидат комплетни, но нашата позиција исто така останува непроменета – немаме намера да влијаеме на правосудството и на одлуките на судот во однос на приведените пратеници. Тоа е недозволиво, законот важи за сите. Но, ќе кажам дека притворот не смее да биде казна. Сепак, тоа е обврска и право на обвинителството и судовите во Македонија“ рече Заев.
Од друга страна Мицковски најави дека има чувство дека многу брзо ќе бидат надминати проблемите и ВМРО ДПМНЕ ќе може да бидат комплетни во Собранието.
,,Во моментов, ВМРО ДПМНЕ останува на своите позиции, прашањето е од математичка и политичка природа и ние не можеме да бидеме комплетно активни во Собранието. Се надевам и имам чувство дека многу брзо математичките и политичките проблеми ќе бидат надминати и ВМРО ДПМНЕ ќе може да се врати во Собранието и да биде целосно посветена на работата во парламентот, рече Мицковски по средбата со премиерот Заев.
Мицковски додаде дека комплетирање на пратеничката група за него значи стопроцентно присуство на целата пратеничка група на ВМРО ДПМНЕ и на коалицијата . Тој не прецизираше што за ова очекува да стори премиерот или судската власт, но нагласи дека ВМРО ДПМНЕ само така ќе се чувствувала комотно во Собранието.
Мицкоски и Заев се согласиле да се врати старото решение за изборот на членови на ДИК . Ова значи опозицијата да го предложи претседателот на ДИК, а власта да има мнозинство во комисијата. Според пржинскиот договор, тројца членови во ДИК беа избрани по предлог на власта, тројца од опозицијата, а тројца меѓу кои и претседаталот беа избрани од редот на независните експерти. Новиот изборен закон се очекува да биде усогласен до септември.
Заев и Мицкоски потврдија дека наредната недела , ќе биде постигнат консензус и за најголем број од законите за кои разговараат работните групи на СДСМ и на ВМРО ДПМНЕ ( законот за следење на комуникациите, законот за заштита на сведоци). Двете страни не постигнале договор за законот за јазици.
Како што рече Заев, ако се има малку разум, законот треба да се донесе во Собранието, па кој смета дека не е уставен да го оспори пред Уставниот суд, а не да се блокира Собранието пред вакви важни моменти за изгласување еден куп реформски закони од кои зависи европската иднина на Македонија.
Заев го информирал Мицкоски за преговорите за спорот за името – на оваа тема нема никакви поместувања од претходната лидерска средба во клубот на пратенците.
Го инфомиравме како шеф на опозицијата како течат преговорите, остануваме оптимисти дека може да се најде решение, но тоа мора да значи и сочувување на достоинството и идентитетот на двете страни во преговорите.Јас се надевам дека за ова прашање можеме да создадеме национален консенсуз.
На почетокот на април ќе има нова средба со медијаторот Нимиц, а во меѓувреме во третата или четвртата недела од март, во Македонија ќе слета грчкиот министер за надворешни работи Коѕијас.