Се очекува медијаторот во спорот за името Метју Нимиц да го закаже конечниот датум на средбата меѓу претставниците на Македонија и на Грција во Њујорк, изјави денеска премиерот Зоран Заев во врска со одложената рунда разговори што беше најавена за почетокот на наредната недела.
– Јас споделив информација при посета во странство. Транспарентни сме, го кажав тоа што го имав. Состанокот го закажува Метју Нимиц. Уште вечерта истиот ден ми стигна информација дека е одложен, веројатно од некој од претставниците кои учествуваат во тимот. Средбата е замислена со цел медијаторот Нимиц, кој е нејзијн организатор, да се види со преговарачките тимови, не е на политичко ниво на министри, премиери, претседатели на држави и слично. Затоа ќе очекуваме тој да ги потврди конечните датуми, рече Заев.
Средбата на претставниците на Грција и на Македонија со медијаторот Метју Нимиц што требаше да се одржи на 20 или 21 ноември е одложена и најверојатно ќе биде одржана во текот на декември, без да се посочат причините за тоа. На средбата, што беше закажа по подолга пауза, според грчките медиуми, Нимиц требало да излезе со конкретен предлог за решавање на спорот.