Никола Груевски никогаш повеќе нема да биде премиер. Се докажа дека Груевски го нема потребното мнозинство за формирање Влада. ВМРО-ДПМНЕ ја изгуби можноста, порача денеска Зоран Заев на прес-конференција.
Како што вели тој, Македонија нема време за губење, демократските промени се почнати бидејќи така одлучиле над 600.000 граѓани.
– Очекувам Иванов да ми го додели мандатот оти се друго би било кршење на Уставот. За сите е јасно дека граѓаните гласаа за промени. На Македонија и е потребна влада што ќе ги обедини граѓаните наместо да ги дели. Потребна е влада која ќе го подобри квалитетот на животот за сите и влада која ќе ги определи стратешки интереси на патот кон ЕУ и НАТО. Ние сме подготвени за формирање на влада која ќе ги спроведе реформите од договорите од Пржино и Итните реформски приоритети од Прибе, исклучиво во служба на граѓаните, порача лидерот на СДСМ.
Тој рече дека владата која тој ќе ја предводи ќе гарантира дека сите граѓани без разлика на етничката или верската припадност ќе имаат исти правапред институциите.
– Едно општество за сите граѓани. Ветивме живот во Македонија и имаме обврска бидејќи можеме и сакаме тоа да го направиме, порача Заев.