„Ова е историски момент, ова е прв самит на НАТО за Северна Македонија како полноправна членка. Тоа е исто така прв Самит за НАТО со 30 членки. Ова е голем успех и за Северна Македонија и за НАТО“, рече претседателот на Владата на Република Северна Македонија Зоран Заев, пред денешниот Самит на НАТО во Брисел.
„Членството во НАТО беше реализација на нашата стратешка цел, но дополнително со нашето членство, Алијансата ја подобри безбедноста и стабилноста на регионот на Западен Балкан. Ние сме посветени на визијата за Балканот во 21 век, како регион на мир, стабилност и зголемена регионална соработка за економски придобивки и просперитет на сите граѓани. Силно веруваме дека е потребно сите земји од Западен Балкан да имаат кристално јасна евроатлантска и ЕУ перспектива. Оставањето вакуум во нашиот дел од Европа не е опција. Потребни ни се предвидливи, кредибилни и повторно засилени процеси на интеграција во ЕУ и НАТО“, рече премиерот Зоран Заев.
Денес сме тука за да го потврдиме нашето единство, кохезија и солидарност, рече Заев додавајќи дека Северна Македонија ги дели истите вредности со сојузниците и е целосно посветена на колективната безбедност.
„Затоа што ние сме НАТО. Заедно сме посилни!“, заклучи Заев.
Премиерот ќе учествува во работата на Северноатлантскиот совет на НАТО на кој лидерите на земјите членки ќе разговараат за најважните прашања за иднината на Алијансата. Во делегацијата на годинешниот Самит на НАТО 2021 на шефови на држави и влади во Брисел се и министерката за одбрана Радмила Шекеринска и министерот за надворешни работи Бујар Османи.