Премиерот Зоран Заев очекува владината коалиција да опстои и по локалните избори, а парламентарното мнозинство да остане стабилно и да расте. Тој рече дека е отворен за соработка со сите, вклучително и со поединци од опозициската ВМРО-ДПМНЕ, во интерес на граѓаните и на државата.
– Продолжуваме заедно со ДУИ, ги поддржуваме кандидатите на ДУИ и веруваме дека тоа ќе биде најизвесниот добробит за граѓаните на Македонија, изјави денеска Заев.
За коалицирањето на Алијансата за Албанците на Зијадин Села со БЕСА за вториот круг и дали прегрупирањето ќе значи и нејзини излегување од Владата по 29 октомври, Заев рече дека тоа е легитимно право зашто има противкандидат од ДУИ во Гостивар и во Струга.
– Немало отворен состанок, дебата, дилеми или било што, дали Алијанса излегува или не. Секако, право е на Алијанса како ќе одлучат тие. Јас очекувам дека владината коалиција ќе опстои и ќе продолжи да зајакнува во периодот што претстои. Но убеден сум дека парламентарното мнозинство е стабилно и тоа ќе расте, изјави Заев.
Рече дека немат никаков договор со ДПА ниту имал состанок со лидерот на таа партија Мендух Тачи за коалиции за ново парламентарно мнозинство или учество во власта.
Немал состанок ниту со реформаторите во ВМРО-ДПМНЕ. Потсети дека ДПА во март била незаинтересирана да влезе во власта, како и БЕСА која, како што рече, одлучи да не влезе со испораката на неприфатливи работи.
– Отворени се вратите за соработка со сите. Владиното мнозинство треба да расте и треба да биде постабилно зашто пред Македонија се сериозни одлуки коишто треба да ги носиме. Остануваме отворени за разговор со сите, вклучително и за поединци од опозицијата предводена од ВМРО-ДПМНЕ. Зборувам генерално како луѓе со луѓе. Македонија е исправена пред сериозни реформи, ни требаат соработки. Знам дека доста нивни пратеници досега изразиле несогласување со политиките на ВМРО-ДПМНЕ и полека се оградуваат. Јас не претендирам тоа да значи нивно преминување во СДСМ, само барам соработка во интерес на граѓаните и на државата, истакна претседателот на СДСМ и премиер Заев.
Интервјуто на лидерот на ВМРО-ДПМНЕ Никола Груевски го оцени како хаотично, а на неговите обвинувања за изборни нерегуларности рече дека на влезот на самата кампања сите анкети покажувале водство на СДСМ и колаицијата.
На обвинувањето за прислушување на раководството на ВМРО-ДПМНЕ, Заев одговори дека со промена на власта нема незаконско прислушување во Република Македонија, посебно не, како што рече, кон политичкиот противник.
Во врска со најавата на ВМРО-ДПМНЕ за реферндум за договорот со Бугарија по изборите, Заев рече дека е демократ и дека демократското право секојпат треба да се користи, но да биде согласно со процедурите, законот и прописите што ги дефинира Уставот.
– Истовремено и во согласност со нашата поставеност на градење пријателства со соседните земји. Отворен сум за дебата и сакам да ги видам сите различни мислења, додаде Заев.