Предлагаме изборите да се одржат на средината на јуни, датумот што го предлагаме е 14 јуни, изјави лидерот на СДСМ, Зоран Заев по координативната средба со претседателите на партиите од коалицијата „Можеме“. Ова, како што нагласи, ќе биде предложено и во вторник, на лидерската средба кај претседателот, Стево Пендаровски на која се очекува да биде утврден датумот за одржување на вонредните парламентарни избори во земјава.
Првиот човек на СДСМ го образложи ваквиот став со потребата од кредибилни институции кои ќе работат во полн капацитет за справување со кризата од ковид-19.
„Веќе втор месец сме во вонредна состојба, повеќе од четири месеци имаме техничка влада, три месеци како е распуштено Собранието. Потребни се и Собрание и Влада за преземање на конкретни чекори, пред сè, за надминување на економската криза. Со тоа, сè повеќе се наметнува потребата од одржување на парламентарните избори“, рече Заев.
Заев образложи дека во ситуација кога интензитетот на кризата се намалува, изборите треба да се одржат, бидејќи во такви услови нема загрозување на здравјето на граѓаните. Тој рече дека на државата и се потребни избори, веднаш штом се создадат услови за нивно одржување, а во моментот охрабрува тоа што мисијата на ОДХР најавува дека може да се организира и да прати набљудувачи, а и други држави не случајно одат на избори во овој период.