Лидерот на СДСМ, Зоран Заев денеска образложи дека СДСМ ги разгледува сите правни опции за да ги извлече своите министри од Владата, а кои биле заробени од страна на Никола Груевски и ВМРО-ДПМНЕ.
– ВМРО-ДПМНЕ и ДУИ ги заробија министрите Спасовски и Ременски во Владата. Тие не можат да си дозволат да не го почитуваат законот. Еве има судење за Диво насеље денес, министерот Сапсовски е единствениот што може да стави потпис за употреба на полициските мерки. Не може да се дозволи и примателите на социјална помош да патат заради тоа. Правиме правни напори да ги извлечеме министрите од Владата. Тие нема да учествуваат во организирање нефер и недемократски избори, рече Заев.
Тој исто така потенцираше дека веќе не поседуваат материјали и дека не можат да пласираат т.н “бомби“ во јавноста согласно Договорот од Пржино, а за кој рече дека Никола Груевски го минирал и не ги почитува реформите во него.
– Груевски и се е можно. Нема да не чуди ако направат обид да го укинат СЈО преку Уставниот суд. Сепак мислам дека нема да одат на такво безобразие. Но доколку тоа се случи, СЈО има обврска да ги врати сите материјали на опозицијата. Ќе повторам само дека сите материјали што ги поседувавме ги предадовме на СЈО, одговори Заев.
Во однос на тоа дали е можен нов анекс на Договорот од Пржино во посредство на меѓународната заедница, лидерот на СДСМ рече дека се што е во интерес на земјава за СДСМ е прифатливо.
– На се што е контра ќе се спротиставиме. Сите опции што ќе бидат понудени од сите во државата, од европските и американските институции е прифатливо, одговори Зоран Заев.
Заев денеска повика на широк граѓански фронт за слободна Македонија против Никола Груевски, за како што вели тој, враќањето на демократијата и слободата.
– Или Македонија или Груевски, порача Заев, дополнувајќи дека земјата нема да прифати лажирани избори а опозицијата останува гарантор на тоа.
Својот повик тој го упати до коалициските партнери на СДСМ, политичките партии, невладините организации, здруженијата, синдикатите, интелектуалците, професорите, вработените, невработените и целата демократска јавност.
Заев дополни дека во новата, слободна Македонија треба да има фер избори и слободни медиуми, независни институции во служба на граѓаните, вистинска борба против корупцијата и криминалот и да се вратат европските вредности и зачувување на националните интереси на Република Македонија.