Премиерот Зоран Заев одговарајќи на новинарско прашање во врска со протестите пред домовите на пратениците на СДСМ по донесувањето на Законот за употреба на јазиците, изјави дека протестот е уставно право, но она што се прави пред домовите на пратениците, пред нивните деца, членовите на нивните семејства и родители апсолутно е недозволиво.
-Тоа е кршење на приватноста на домот, директни закани се упатуваат, омаловажување и целосно сеење страв и трепет кај дечињата. Ние нема да дозволиме тоа така да продолжи. Децата на пратениците, лично јас, а и сите околу мене ќе ги заштитиме, рече Заев.
Тој посочи дека МВР презема дејствија, бидејќи се работи за кривични дела.
Тој нагласи дека не очекува нова политичка криза во земјава и покрај протестите пред домовите на граѓаните и најавите за протести од најголемата опозициска партија.
– Се е јасно кој стои зад протестите пред домовите на пратениците и како ги организира, но и апсолутно е јасно кој и какви пари и од каде ги прима за тоа, потенцира Заев.
Посочи дека она што се направи во Собранието при носењето на Законот за употреба на јазиците веројатно беше единственото можно решение согласно правото на претседателот на Собранието да констатира неделовничка и неуставна можност за блокирање за да се разгледуваат амандманите, после одлуката да се блокира функционалноста со поднесувањето 36.000 амандмани.
– Ние сме мултиетничка земја и многу е лесно да го посеете семето на национализмот, а прашање е како да изградите општество во кое секој ќе се чувствува рамноправен. Апелирам Закнот да се пушти, да заживее и сите ќе видат дека не е болка за умирање, туку е за употреба на јазикот, а јазикот е за да се разбереме. Ништо нема да се промени во Македонија и безобразно е да се зборува дека во источна Македонија ќе морало да се учи албански јазик и дека ќе имало казни ако не се знае, или пак администрацијата ќе морала да учи албански јазик. Тоа се лаги, рече Заев.