Премиерот Зоран Заев вечерва присуствува на свечената гала на конференцијата на „Економист“ во Атина, на која се обрати премиерот на Грција, Киријакос Мицотакис, соопштија од Владата. На гала вечерата присуствуваат министерот за внатрешни работи на Грција, Макис Воридис, министерот за туризам, Харис Теохарис, поранешниот претседател на Европскиот Парламент Мартин Шулц, поранешната претседателката на Хрватска, Колинда Грабар Китаровиќ, поранешниот француски премиер, Доминк Де Вилпен, амбасадорот на САД во Атина, Џефри Пајат, како и бројни дипломати, бизнисмени, стопанственици.
Заев, како што најавуваат од Владата, утре ќе учествува на панел дискусијата во рамките на конференцијата на „Економист“ – 25 Тркалезна маса со Владата на Грција на тема: „Од социјално дистанцирање до социјална солидарност“. Утре ќе се потпише и Договорот меѓу македонската и грчката Влада за развој на интерконекцијата за пренос на природен гас.
Средбите кои ќе се реализираат во фокус ја имаат економијата и енергетиката. Покрај Заев, на економскиот форум во Атина, присутни се и вицепремиерот за економски прашања Фатмир Битиќи и министерот за економија Крешник Бектеши. Економската соработка меѓу двете земји по потпишување на Договорот од Преспа се зацврстува и интензивира, велат од Владата.