Published: Sunday, July 5, 2020 20:52
Отсекогаш сме биле заедно како етнички заедници. Со векови. Само лажните патриоти 11 години нè делеа. Но, падна едниот, сега ќе падне и другиот. ДУИ е на власт 17 години и здраво е да минат во опозиција. Ударот што ќе го зададеме на ВМРО ДПМНЕ е шанса за нивна реформа. Ќе победиме со разлика од 50.000 до 100.000 гласови, истакна лидерот на СДСМ, Зоран Заев на денешната средба со граѓани во скопската општина Чаир.
„Како минува кампањата, така расте поддршката за нас. Се топат и разобличуваат како стиропорот од нивните фасади. Паѓаат од секој ветар и по секој дожд излегува нивното вистинско лице. Се обидуваат со гнасна и негативна кампања против мене, ама од мене нема спас. Уште ќе ме гледаат“, со оптимизам говореше Заев пред чаирчани и ги повика гласачите да ја дадат довербата за Никола Димитров и Мила Царовска во првата изборна единица и за Оливер Спасовски и Сања Лукаревска во втората единица.
Заев потсети на негативната кампања на ВМРО ДПМНЕ, но тоа е така затоа што, како што рече, опозицијата нема што да понуди кога настапува со истите кадри на Груевски.
„Јас сум им виновен за сите нивни неуспеси, за сите грозотии. Еве, виновен сум и за платите, за пензиите, за НАТО. Ама имаат во ВМРО-ДПМНЕ исцелител, па може ќе ме исправи и мене да не бидам веќе крив. Кормилото на шефот Груевски не функционира, компасот на ВМРО-ДПМНЕ не работи. Едната нивна носителка на листа кога се кандидираше за претседател на државата велеше Преспанскиот договор и Рамковниот договор се завршена работа, сега не било така, ќе ги поништела. Нема да ги поништи, нема ни шанса нема ни поддршка. Тоа се договори за мир, за стабилност, за мостови на пријателство, никој тоа не може да го поништи“, истакна Заев и повика граѓаните да се определат за европска и демократска држава, опција која ја нуди коалицијата „Можеме“.