Премиерот Зоран Заев денеска беше повикан во Специјалното јавно обвинителство, како што информираше тој, во својство на оштетен во случајот кој СЈО го води под кодно име “Таргет”.
Одговарајќи на новинарско прашање во однос на прислушувањето, кој би бил новиот директор на УБК, и дали постои можност Верушевски да дојде на таа позиција, Заев рече дека ексдиректорот на оваа институција ги исполнувал сите услови, но дека, најважно му е на чело на УБК да застане експерт кој ќе биде соодветна гаранција дека во Македонија службите работат соодветно.
Дополнително одговарајќи на новинарско прашање, зошто со истрагите на СЈО се опфатени луѓе од ВМРО ДПМНЕ, Премиерот потенцираше дека ако постои индиција за криминал за било кој од СДСМ, тој треба да одговара, но дека изминативе 11 гостини тие како партија немале пристап до јавните пари и да раководат со нив.
Заев информираше дека како прв меѓу еднаквите во Владата, ќе направи се да се продолжи мандатот на СЈО за да ја заврши задачата за кое беше формирано а тоа е да расчисти со индициите за криминал кои произлегоа од прислушуваните разговори.
Тој наведе три можности за решавање на ова прашање. Едната, како што рече, е преку измени на Законот за СЈО во Собрание со двотретинско мнозинство, другата е преку Уставниот суд и последната е СЈО да биде инкорпорирано како посебно одделение во редовното Јавно обвинителство.
Во однос на денешното позитивно мислење од Советот на јавни обвинители за разрешување на Зврлевски, премиерот Заев го повтори ставот дека останува отворен на местото републички обвинител да застане експерт од правната фела.