Службени возила, канцеларии и други јавни државни добра ќе бидат забранети за користење на претстојните локални избори. Владата ќе формира координативно тело за да контролира дали се спроведуваат мерките за претстојните локални избори бидат фер и демократски.
Премиерот Зоран Заев на денешата конференцијата „Одвојување на државата од политичките партии“ рече дека Владата за реализирање на оваа цел донела упатство за забрането користење државни ресурси за лични и партиски цели.
-Нема веќе злоупотреба за лични, партиски, ниту за изборни цели. Администрацијата може да биде спокојна, без уцени, закани и притисоци , рече Заев, ветувајќи „нула толеранција за изборните измами, заплашување на администрацијата и други притисоци од страна на државните институции “.
Заев ги повика граѓаните „слободно да сугерираат за сè што мислат дека е потребно за фер и регуларни избори“.
Евроамабасадорот Самуел Жбогар рече дека многу е важно ветувањето што го даде премиерот Зоран Заев дека ќе ја оддели државата од партијата.
-Најважно е политичките лидери и партии да ги спроведат кампањите без какви било заплашувања, како и да не се подгреваат меѓуетничките односи, рече Жбогар.
Во сите досегашни сите извештаи на ОБСЕ, како и во Пржинскиот договор најголемите забелешки беа дека мора да се одвои државата од партијата.
На тоа посочи и извршниот директор на МОСТ, Дарко Алексов, според кого новата влада има доволно примери од минатото за непочитување на принципот на одвојување на државата од партијата и дека треба да направи се, злоупотребите од минатото да не се повторат.
На конференцијата „Одвојување на државата од политичките партии“ што е во тек покрај МОСТ, учествуваат и претставници од ЦИВИЛ, од Институтот за европска полтика, од „Евротинк“ – Центар за европски стратегии, од Центарот за управување со промени, од „Транспаренси интернешенл“ и претставници на политичките партии.