Вонредната состојба значи повеќе можности за Владата да се справува со коронавирусот и со економските последици. Во однос на начинот на функционирање на државата и општеството, вонредната состојба сама по себе не воведува нови ограничувања за граѓаните, напиша лидерот на СДСМ, Зоран Заев на својот Фејсбук профил.
„Додека не се донесат нови мерки од Владата, се останува исто во поглед на секојдневниот живот. Маркетите и натаму ќе работат, компаниите исто така, а институциите непречено ќе ги извршуваат сервисите. Во овој момент нема нови ограничувања на движењето на граѓаните“, нагласува Заев.
Во услови на вонредна состојба, појаснува тој, Владата добива и законодавна и извршна власт. Со тоа, пишува поранешниот премиер, се олеснува нејзината работа во време на кризи и може да носи одлуки многу побрзо и поефикасно за добро на граѓаните, односно да управува со ресурсите на државата.
„Уште еднаш сакам да ја поздравам иницијативата на Владата, како и одлуката на Претседателот Стево Пендаровски за прогласување вонредна состојба. На сите нас останува да се придржуваме до мерките и препораките на институциите, со цел побрзо надминување на состојбата предизвикана од коронавирусот“, се вели на крајот од постот на лидерот на владеачката партија.