Лидерот на СДСМ Зоран Заев денеска изјави дека од Судот бил информиран дека рочиштето за предметот Пуч што било закажано пред месец ипол нема да се одржи.
– Ние од опозицијата поднесовме жалби на овие постапки, кои што се резултат на незаконската и неуставната, аболиција од Ѓорге Иванов, кое што само по себе, претставува преседан, да се аболицира сведок, да се аболицира странски државјанин, и мал милион дурги глупости во самиот акт. Жалбите до Апелација се поднесени по однос на решенија за мене, Зоран Верушевски, неговата сопруга, но и од сите кои сме вклучени во овој срамен предмет „Пуч“, но и за другите предмети кои се против нас. Во ова наше општество стана некако драматично да се изедначува со некаков акт на аболиција тој што е жртва и тој што е злосторник во општеството. Ние тоа нема да го дозволиме. Ние можеби сме единствени, кои сакаме по правен пат да ја поништиме аболицијата, актот за помилување од Ѓорги Иванов. Прашање е дали Никола Груевски, Миле Јанакиески, Гордана Јанкулоска и другите имаат отворено ваква постапка за да покажат навистина дека се против аболицијата која им е дадена од Иванов, изјави Заев.
Тој најави дека правото на правично судење го продолжуваат преку Апелација се до Стразбур, користејќи го членот 6 од Европската конвенција.
Поранешниот директор на Управата за безбедност и контраразузнавање Зоран Верушевски, пак, истакна дека ги користат правните „лекови“ за случајот „Пуч“ и дека јавноста треба да знае дека по одлуката на аболиција, тие во законските 3 дена поднеле жалба и чекаат Апелација да им одговори.
– Ако нашата жалба се отфрли, тогаш нашата правда ќе ја бараме пред Меѓународниот суд во Стразбур, изјави Верушевски.
Одговарајќи на новинарско прашање, Заев рече дека ниту до него, ниту до партијата не стигнало писмо од еврокомесарот Јоханес Хан, како што со денови се шпекулираше во јавноста дека такво писмо наводно е испратено до четворицата потписнички на Договор од Пржино.
Во однос на наводното писмо од евроамбасадорот Аиво Орав, лидерот на СДСМ не сакаше да коментира.
– Тоа што јас го знам е во континуитет повторување на нивните ставови, односно условите за избори, поништување на актот за аболиција и секако, одржување на изборите тогаш кога ќе се создадат услови за фер и демократски избори. Деталите од ваквите пораки може да ги соопштат само тие за кои велите дека ги имаат соопштено или ги имаат кај себе. Јавноста и медиумите знаат дека конструктивниот фактор во целиот овој процес е опозицијата и ние тоа и ќе останеме. Нашите услови јавно ги кажавме, а тие се укинување на аболицијата и собранието да биде свикано заради исполнување на условите за одржување на фер и демократски избори. Ние сме конструктивен партер и ако тоа се случи спремни сме да ги продолжиме преговорите за сите барања кои беа испорачани во овој период, рече Заев.