Покрај веќе закажаните 37 рочишта, судијката Добрила Кацарска денеска закажа уште 28 термини за насилствата од 27 април 2017 година. Заклучно со јануари следната година, закажани се 65 рочишта.
Денешното беше последно рочиште на кое одбраната ги даде воведните зборови, а заврши со изјаснување на сите 33 обвинети- 31 за тероризам и двајца за помагање на истото дело. Сите се изјаснија дека не се виновни за делото за кое се товарат во обвиението од ОЈО.
Обвинетиот Горанче Ангеловски, на денешното рочиште одби да даде воведен и не го прифати бранителот, што судот му го именува по службена должност, откако на минатото рочиште тој се откажа од својот адвокат.
Претседател на судечки совет е Добрила Кацарска. Обвинителка е Вилма Рускоска.
Ова е четврто рочиште од почеток на судењето. Претходните три расправи траеја повеќе од шест часа.
Судскиот процес започна минатата недела со воведни говори на обвинителката Вилма Русковска и адвокатите на обвинетите.
Обвинителката Русковска во воведниот говор истакна дека има докази со кои ќе ги потврди наводите од обвинението за сторено кривично дело терористичко загрозување на уставниот поредок, а одбраната тврди дека не постојат докази кои укажуваат на тоа и обвинија за политички мотивиран процес.
На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.
Од обвинетите 11 лица се во притвор, 13 се во куќен притвор, а осуммина имаат мерки за претпазливост и гаранции. Нивната намера, според обвинителството, била да го загрозат уставниот поредок и да го спречат изборот на Талат Џафери за претседател на Собранието.
Според обвинението, Чавков како носител на „златна команда“, иако постојано добивал известувања дека во Собранието е загрозен животот на новинарите и на пратениците, со уште двајца носители на „сребрена команда“ не издале наредби за распоредување на дополнителни и специјални полициски сили за внатрешно и надворешно обезбедување на Собранието, не издале наредба за евакуација и им овозможиле на насилниците да влезат внатре. Чавков беше притворен, но со гаранција во вредност од 600.000 евра во недвижен имот тој беше пуштен да се брани од слобода.