Во Собранието утре попладне треба да се одржи седница на чиј дневен ред е Законот за јазиците во трето читање. Ова е договорено на денешната средба на претседателот на Собранието Талат Џафери со координаторите на пратеничките групи на која присуствуваа и потпретседателите на Парламентот.

Од Кабинетот на Џафери се уште нема официјална информација, туку најавија дека за закажаниоте седници ќе има објава на веб-страната на Собранието до крајот на денот.

Седницата за амандманите требаше да се одржи минатиот вторник, но тој обид пропадна поради тоа што ДУИ и СДСМ не постигнаа договор дали да се отвори расправа за амандамните поднесени од ВМРО ДПМНЕ. Тогаш дел од пратениците на СДСМ бараа за амандманите да се расправа без да се крши Деловникот на Собранието.

Координаторот на пратеничката група на опозициската ВМРО-ДПМНЕ Драган Данев, кој денеска повторно не присуствуваше на координацијата, вели дека доколку седницата биде закажана тие ќе присуствуваат на неа со цел да ги бранат амандманите.

– Нашиот став за амандманите останува ист, вели тој додавајќи дека тие треба да се разгледуваат на седница.

Претходо и лидерот на ВМРО ДПМНЕ Христијан Мицкоски повеќепати изјави дека немаат намера да ги повлечат амандманите. Тој предлози, наместо тоа, власта да го повлече законот и да се формира експертска група која би изработила нов закон.

Премиерот Зоран Заев вчера рече неделава се очекува да биде донесен законот за употреба на јазиците, а по девет месеци расправата треба да биде завршена.

– Прашањето треба да биде што побргу затворено. Порано овие закони се носеа по самото завршување на парламентарните избори, сега дадовме девет месеци дебата. Сите кажаа сè што имаа да кажат. Тоа е оневозможено уставно право на граѓаните од другите етнички заедници. Нека се донесе законот, нека се спроведе и ќе видиме сите дека не било ништо толку тешко и трагично, туку ќе овозможи полeсно да се разбираме едни со други, изјави Заев.

Според премиерот, пратениците од парламентарното мнозинство дале уште една недела шанса за дијалог и разговор за решение прифатливо за опозицијата.

– Но, оваа недела законот треба конечно да се донесе. Чекорите ќе се движат во согласност со демократските процедури и ваквите прашања што ќе ја крепат мултиетничноста на државата, конечно, ќе бидат затворени, порача премиерот.

Законот за употреба на јазиците е во трето читање во Собранието, откако тој непотпишан и со низа забелешки беше вратен во Собранието. Врз основа на овие забелешки 35.569 амандмани поднесе само опозициската ВМРО-ДПМНЕ, за кого законот е неуставен и треба да се повлече.